14\4\2008

"خليك أسد"

كتمان المشاعر السلبية من أكثر الأشياء التي تؤثر على الإنسان و على حياته سواء صحيا أو نفسيا و علشان كده أنا عاوز كل واحد فيكوا يطّلع اللي جواه من غير خوف... هنفضل خايفين لغاية إمتى؟!؟
أنا مثلا إمبارح طلعت كل المشاعر السلبية اللي عندي والمعروف طبعا هي تجاه مين...
قلتلها بكل صراحة و بدون خوف : شوفي أنا راجل البيت يا هانم, مش كل حاجة كلامك اللي يمشي فيها .. لما يبقى يطلعلك شنب تبقي تمشي كلامك عليا... من هنا ورايح الكلمة كلمتي في البيت, و أي إعتراض منك هيكون الرد عليه قاسي و عنيف.. هرزعك على بوزك على طول .. أنا ما عنديش ياما إرحميني . مش علشان دلعتك شوية يبقى خلاص, و خلي بالك أنا أخرج مع أصحابي و قت ما أنا عاوز و أرجع وقت ما أنا عاوز , و إياكي تسأليني رايح فين و جاي منين . كفاية قهر كده .
و لما أرجع البيت تكوني محضره طشت ميه و ملح علشان تدعكيلي رجليا .. سي السيد مش أحسن مني , من النهاره أنا سي أحمد .. و مفيش حكومة أنا الحكومة..
و اللي مش عاجبه الباب يفوت جمل .
و يكون في علمك ما أسمعش صوتك في البيت , لو صوتك طلع و أنا في البيت ليلتك سودا.. أنا الراجل , أزعق و أشخط و أشتمك كمان و تقولي أمرك يا سي أحمد , إنتي فاهمة و لا لأ.
و فضلت على كده يا معلم ييجي نص ساعة نازل زعيق و شخط و نطر و فين يوجعك.. و بعدها حسيت براحة كبيرة جدا و سلام نفسي ما حسيتوش من زمان .
و أكيد الراحة دي هاتكون أكبر لو قلتلها الكلام ده في وشها مش قدام صورتها و هي مش موجوده زي أنا ما عملت ..
طيب لو مراتك مضايقاك و منغصة عليك عيشتك و مش قادر تفتح بقك و نفسك ترزعها قلم محترم ينزل يطرقع على خلقتها الكريمة تخلص فيه زهقك منها , لكن طبعا مش قادر... تعمل إيه؟!؟ أنا عندي الحل .. هاقولك تعمل إيه ,بس ركز معايا :
حضرتك تستنى لما مراتك تنام و تيجي إنت و ترقد جنبها على السرير .. إفرض إن مراتك نايمة على شمالك (جنب إيدك اللي مش بتاكل بيها و إوعى تكون بتاكل بإيديك الإتنين) ... تنام حضرتك على ظهرك بحيث تكون المسافة بينكوا أقل من طول ذراعك بشوية (لازم تحسب المسافة كويس و إلا القلم مش هيطرقع زي ما إنت عاوز) و بعدين تفرد ذراعك و إيدك اليمين على أخرها و تغمض عينيك و تروح فجأة متقلب على جنبك الشمال و إيدك مفروده و هوبااا... طاااخ , تروح إيدك نازلة على وشها عدل و أهم حاجة إنها لما تصحى تصوت من القلم تعمل إنت إنك يا عيني نايم و بتتقلب و مش قصدك و لما تصحى : معلش يا روحي الحقيقة كان غصب عني .
دي وصفة أنا شخصيا جربتها .. لكن يا ريت ما تغلطش غلطتي و تكمل نوم جنبها بقية الليلة و إلا هاتصحى من النوم زيي على بوكس في عينك قال إيه كانت بتحلم إنه فيه حرامي دخل البيت ...
معلش لازم أقوم دلوقت علشان ميعاد الدكتور جه . أصل الورم اللي في عيني راح بس لسه فيه ألم.