4\6\2008
"عالم حريم حريم"
يا أخي حاجة تفلق .. كل شوية تلاقي كتاب عن المرأة .. كيف تفهمها , ماذا تريد المرأة , كيف تفكر المرأة , كيف تكسب زوجتك ...إلخ . و خد عندك أفلام من النوع ده: البنات عاوزة إيه و فيه منه فيلم إنجليزي كمان .
طيب و الراجل المفحوت ده مالوش نصيب حد يغلط و يشوفه عاوز إيه ولا نفسه في إيه قبل ما يفطس من اللي بيجراله !! ..
مفيش واحده ست عندها شوية دم تكتب عن الراجل أو الزوج؟
أنا كتبت المرة اللي فاتت عن التحول اللي بيحصل للزوجات بعد الجواز و الحاجات اللي بتخنق الراجل من مراته , تعالوا نتكلم النهارده عن الراجل عاوز إيه, و إيه اللي نفسه يشوفه في مراته من طباع و أخلاق.
يا أخي حاجة تفلق .. كل شوية تلاقي كتاب عن المرأة .. كيف تفهمها , ماذا تريد المرأة , كيف تفكر المرأة , كيف تكسب زوجتك ...إلخ . و خد عندك أفلام من النوع ده: البنات عاوزة إيه و فيه منه فيلم إنجليزي كمان .
طيب و الراجل المفحوت ده مالوش نصيب حد يغلط و يشوفه عاوز إيه ولا نفسه في إيه قبل ما يفطس من اللي بيجراله !! ..
مفيش واحده ست عندها شوية دم تكتب عن الراجل أو الزوج؟
أنا كتبت المرة اللي فاتت عن التحول اللي بيحصل للزوجات بعد الجواز و الحاجات اللي بتخنق الراجل من مراته , تعالوا نتكلم النهارده عن الراجل عاوز إيه, و إيه اللي نفسه يشوفه في مراته من طباع و أخلاق.
أولا: أهم حاجة في حياة الراجل اللي طافح الكوته في شغله و أقل حق من حقوقه إنه لما يرجع البيت يلاقي مراته بتقابله بإبتسامة و كلمتين حلوين .. حاجة صعبة دي ؟!؟ الإبتسامة و الكلمتين الحلوين دول كفيلين بمسح تعب اليوم كله و تهيئة الراجل للحياة السعيدة في البيت.
ثانيا:مش لازم ابدا موال الشكاوي من شغل البيت و العيال و قلة الفلوس يبتدي قبل الغدا (مع إني عارف إنها هواية ممتعة للزوجات) , ممكن يستنى شوية لبعد الغدا علشان الراجل يعرف يبلع اللقمة بدل ما توقفيها في زوره.
ثالثا: لازم الست تكون مهندمة نفسها و مسرحة شعرها قبل ما جوزها يرجع علشان لما يرجع يلاقي منظرها جميل مش يلاقي بره الستات عاملين في نفسهم اللى ما يعمل و يرجع يلاقي أمنا الغوله في البيت.
رابعا:الرقة و الحنية بتاعة الخطوبة لازم تفضل موجوده بعد الجواز و بالرقة و الحنية الزوجة ممكن تلبس زوجها العمة و تخليه يوافق على كل اللي هي عاوزاه من غير خناق و لا مشاكل.
خامسا:لازم الزوجة تحسس زوجها إنها مقدرة تعبه في الشغل علشان هو كمان يقدر تعبها في البيت و مع الاولاد . مش تشتكي من البيت و الأولاد عمال على بطال بطريقة تستفزه و تخليه يتعصب عليها و يقولها ماهو أنا كمان طول النهار تعبان في الشغل يعني مش لوحدك , و طبعا تتقمص هي من كلامه و تكون دي بداية التتر في مسلسل الخناقات اللي ما بينتهيش.
سادسا: لازم الزوجة تعرف إن الراجل جواه طفل صغير لو عاملته بهدوء و حب و أقنعته بالراحة و وفرتله الجو المناسب و الدلع اللازم الحياة معاه هاتكون زي الفل.
طبعا دي مش كل الحاجات أنا لسه بآخد آراء الازواج أصدقائي .. لكن أعتقد بالحاجات دي و ببعض الذكاء من الزوجة ممكن الحياة تكون أسعد بكتير.. و على رأي الراحل فؤاد المهندس : " مش كده ولا إيه"
ليست هناك تعليقات:
إرسال تعليق