أسعار الذهب وصلت 144 للعيار 21 و ده يعتبر انخفاض ملحوض بيحسه كل المتابعين لسوق الذهب و ان كان غير مبرر في الوقت الحالي الا بانخفاض اداء البورصات العالميه الناتج من حالة الركود العالمي و الازمة الاقتصادية العالمية بالاضافة لحالة الهلع الناتجة من انفلونزا الخنازير على مستوى العالم.
جه أباما و مشي أوباما و لم يتغير شئ.
طلع المعلم النتن ياهو قالك "الدولة اليهودية" و عدم وقف الاستيطان و امكانية القبول بدوله فلسطينية و لكن منزوعة السلاح و بلا جيش طبعا و محدش يفكر في القدس لانها عاصمة ابدية لاسرائيل و كمان انكر حق العودة للاجئين الفلسطينيين بالخارج.. يعني باختصار قلم على قفا خطاب السيد المبجل اوباما..
النتيجة : تعليق من الادارة الامريكية بتقول ان ده تقدم كبير في عملية السلام كون اسرائيل وافقت مبدئيا على حل الدولتين و التفاوض.. ناس ذوق ذوق الصراحة.
الحق يتقال الريس حسني استغل حفلة في الجيش كانت فيها عرض مظلات و قفز بالبراشوت و كلام جامد من ده و راح فاقع اسرائيل و المعلم نتنياهو كام تصريح في العضل عجبوني جدا .. ما طلعوش من ذمة الادارة الامريكية.. و طبعا الحكومة المصرية بتخبط في اسرائيل و هي حاطة في بطنها بطيخة صيفي بسبب الخلافات النادرة و الموجوده دلوقت بين الادارة الامريكية و الحكومة الاسرائيلية .
و ده صح 100\100 دي فرصة من الواجب استغلالها و الخروج منها باكبر مكاسب ممكنة سواء من ناحية العلاقات مع الادارة الامريكية الجديدة أو الضغط على اسرائيل للحصول على اكبر مكاسب في موضوع فلسطين بس ربنا يهديهم و يتحدوا علشان تحقيق المصلحة للشعب الفلسطيني الغلبان الدايخ بين فتح و حماس و اسرائيل و مصر و السعودية و قطر .
اشاعة و توقع سمعته و اتمنى الا يتحقق:
بيقولوا ان احتمالات اغتيال اوباما كبيرة جدا خصوصا في 2010 بسبب اتجاهاته و ميوله السياسية و اصولة الاسلامية .. و ربنا يستر.

خبر تاني قرته و احزنني جدا:
الطاعون يتفشى في بلدة ليبية على الحدود مع مصر ..
حاجة غريبة جدا.. معروف ان الطاعون انتهى بعد الحرب العالمية التانيه .. و لم يظهر في اي بلد في العالم من وقتها .. فلماذا يظهر فجأة في بلدة ليبية و على الحدود مع مصر.. اعتقد مش مصادفة .. المشكلة ان المرض بيتنقل عن طريق الفئران و البعوض .. ربنا يستر لسه ما خلصناش من انفلونزا الطيور و الخنازير.