عملوها الوحوش ... عملوها الشجعان ... يا ريتني كنت معاهم.
الكلمه المشهورة بتاعة فيلم "الطريق الى ايلات" هي اول حاجة جت على بالي اول لما قريت الخبر الجميل جدا الخاص بتحرير السفينتين المصريتين المختطفتين في الصومال من قبل القراصنه اللي هناك .
انا اتكلمت عنهم قبل كده و كنت مهتم جدا بمشكلتهم و متابعها لحد لما عرفت انهم و بالتنسيق مع "حسن خليل "صاحب المركب اللي سافر هناك و بميليشيات صوماليه قدروا يتغبوا على القراصنه الصوماليين و يأسروا منهم 8 قراصنه و يرجعوا بيهم كمان في سابقه تاريخيه لم تحدث من قبل .
المهم في الموضوع شجاعة الصيادين المصريين اللي شاركوا في المعركة بمنتهى الشجاعة على الرغم من الحاله النفسيه و الصحيه المترديه لهم خصوصا بعد الخطف المده الطويله دي.
سمعنا و قرينا بعد كده ان المخابرات العامة المصريه كانت بتتابع الموضوع و هي المخطط الرئيسي لعمليه الهروب و ساعدت فيه و امنت رجوع صاحب المركب من بونت لاند لليمن ثم الى مصر و ده شئ يفرحنا و لا يقلل من بطوله الصيادين المصريين اللي خلونا و بكل فخر بعد ما كنا بنقول " احنا اللي دهنا الهوا دوكو" نقدر نقول و بكل الفخر "احنا اللي خطفنا القراصنه" و تحيا مصر يا معلم
ليست هناك تعليقات:
إرسال تعليق