24\4\2008

"مراتي مسافرة"
"مراتي مسافرة و هاعمل حفلة بس ياريت ما تجيش على غفلة" ... الله يبارك فيكوا يا جماعة ..عقبال عندكوا جميعا و مش عاوز حقد ولا حسد من أي واحد متجوز ,و عموما ربنا ما يحرم حد من النعمة دي .. (طبعا أنا أقصد بالنعمة سفر الزوجات مش الزواج نفسه)
الحكاية و ما فيها إن مراتي قررت تسافر تزور الست حماتي و تقعد هناك كام يوم و طبعا المسكين اللي هو أنا مش هايقدر يسافر معاهم علشان ظروف الشغل يا عيني, و ها يقعد لوحده في البيت .. " مش غلبان بالذمة"
و طبعا لابد من إستغلال هذه المناسبة للتنويه على المحظوظين اللي لسة ما إتجوزوش إنهم يتجوزوا واحدة من مدينة تانية و يستحسن من محافظة تانية ..صحيح إنت هاتتشحطط في فترة الخطوبة رايح جاي إنما بعد الجواز يا معلم هاتضمن الحصول على أجازة زوجية زي اللي باخدها أحيانا( و دي ميزة لا تقدر بثمن) .
نرجع لحكاية مراتي.. من كام يوم لقيتها بتقولي:
- على فكرة الأسبوع اللي جاي كله أجازات و عاوزة أروح لماما ..أصلي بقالي كتير ما شفتهاش و وحشتني جدا .
- فعلا .. يا سلام تصوري إنها واحشاني أنا كمان .. بس يعني ها تسيبوني لوحدي كده!! (ما إنت لازم تقول كده , لأنها لو حست للحظة إنك فرحان إنها مسافرة ها ترجع في كلامها ).. دا البيت من غيركوا بيبقى كئيب و فاضي و ساكت و مش بلاقي حد اتكلم معاه.
و سرحت دقيقة أفكر في مشاريعي خلال فترة سفرهم بس فوقت على صوت مراتي بتقول كالعادة :
- خير سرحان في إيه؟؟
- أبدا بفكر هاعمل إيه لوحدي من غيركوا.. ها توحشوني قوي.
- طيب ما تيجي معانا
- ياريت بس انت عارفة الشغل و ظروفه .. معلش متعوضة قريب إن شاء الله بس و الله ما تنسيش تسلميلي على حماتي كتير.
المهم قبل ما أرجع من الشغل في نفس اليوم كنت حاجز لهم تذاكر القطار و وصلتهم المحطة تاني يوم و ودعتهم و الدمعة هاتفر من عيني ..( دموع الفرح طبعا)
و ما نسيتش أوصي الست حرمنا إنها أول ما توصل تتصل بيا تطمني على إنهم وصلوا بالسلامة علشان أبدأ الإحتفالات الرسمية بالأجازة الزوجية .
و أول ما رجعت البيت ودخلت لقيته فاضي ما صدقتش نفسي من الفرحة , و على طريقة (ميل جيبسون ) في فيلم "القلب الشجاع" " .."Brave heart
قلت بأعلى صوتي "freeeeeeedoooom"
أخيرا بقيت حر و لمدة أربعة أيام كاملة يا سلام .. و الله زمان .. مفيش رايح فين و جاي منين , مفيش زن من العيال, مفيش لستة طلبات من السوبر ماركت ,.. و إيه كمان هاتغدى عند أمي " ست الحبايب " اللي أكلها وحشني جدا.. الأكل المضبوط بجد مش الخلطبيطة اللي بناكل منها كل يوم مش باين لها لحمة من فراخ من طعمية.
وفات حوالي ساعة و أنا سارح في أحلام الحرية و مستمتع بيها على الآخر و بعدين لقيت مراتي بتكلمني على الموبايل :
-حمد الله على السلامة يا روحي ..و صلتوا بالسلامة؟
-وصلنا إيه القطر متعطل و من ساعتها و هو واقف مكانه و مستنيين حد ييجي يصلحه أو يجيبوا جرار تاني و لا ده جه و لا ده جه.
-يا خبر مش فايت و بعدين ؟
- و لا قبلين أنا خلاص إتشائمت من السفرية دي, تعالى خدنا من المحطة .
-آخدكوا إزاي .. طيب و حماتي ؟
-أنا خلاص كلمتها في التليفون و هي اللي هاتيجي تقعد عندنا فترة الأجازة,
مش إنت كنت زعلان إننا مسافرين ,خلاص أدينا مش هانسافر , تعالى خدنا من المحطة تاني يللا
رديت و أنا في قمة الحزن و الأسى:
-طيب يا روحي أنا جاي حالا
و نزلت و الدموع في عيني بجد المرة دي ..يا فرحة ما تمت مش قلتلكوا مش عاوز حقد ..
أهي الأجازة الزوجية باظت و كمان حماتي هاتيجي تقضي الأجازة عندنا و كل ده بسبب تعطل القطار ..
تفتكروا لو رفعت على وزير النقل قضية تعويض عن الأضرار النفسية اللي حصلتلي بسبب تعطل القطار أكسبها؟؟!!